සිංහල මිනිස්සුන්ගෙ කුළ බේදය නිසා නායක්කාර් පෙළපත ලේ බින්දුවක්වත් නොසොල්වා උඩරට බලය සිංහලයන්ගෙ අතින් ලබාගත් ආකාරය

 සිංහල කුමාරවරුන්ට උඩරට සිංහාසනාය සිහිනයක් බවට පත් කළ  නායක්කර්වරුන්ගේ " මරුමක්කත්ථායම් " නීතිය .....

ක්‍රිස්තු වර්ෂ 1707 සිට 1739 දක්වා උඩරට රාජධානියේ  කිරුළ  දරන ලද්දේ  ' ශ්‍රී වීර පරාක්‍රම නරේන්ද්‍රසිංහ ' රජු විසිනි .ඔහු අවසන් සිංහල රජු ලෙස කා අතරත් ප්‍රකටය.ඔහුගෙන් පසුව ඇරඹෙන්නේ නායක්කර් වාංශික රජ පෙළපතය.පළමුවන විමලධර්මසූරිය රජුගෙන් ආරම්භ වුණ උඩරට සිංහල රජ පෙළපත  විසින් දරන ලද උඩරට කිරුළ 1739 දී නායක්කර් නොහොත් වඩුග රජෙකු අතට පත්වන්නේ කෙසේද...යමෙකුට මෙය විදේශීය  අක්‍රමණයක් යැයි සිතෙන්නට පුළුවනි.නමුත් එය ඉතා සූක්ෂම ලෙස සංවිධානය කළ සටන් නොමැති දරුණු ඝණයේ ආක්‍රමණයක් නොවන ආක්‍රමණයකි.

                1707 දී දහ හත් හැවිරිදි කුණ්ඩසාලේ කුමාරයා "ශ්‍රී වීර පරාක්‍රම නරේන්ද්‍රසිංහ " නමින් උඩරට රජු බවට පත්වන්නේ සිය පියා වූ දෙවෙනි විමලධර්මසූරිය රජුගේ හදිසි අභාවය හේතුවෙනි. දෙවෙනි විමලධර්මසූරිය රජු හට  බිසෝවරු දෙදෙනෙකුගෙන් පුත් කුමාරවරු දෙදෙනෙක් සිට ඇත.විමලධර්මසූරිය රජු  දකුණු ඉන්දියාවෙන් ප්‍රධාන බිසව නොහොත් මහ රන්දෝලිය ලෙස තබාගැනීමට ගෙන්වාගත් වඩුග බිසව 1690 දී කුණ්ඩසාලේ කුමාරයා බිහි කළාය.දෙවෙනි  විමලධර්මසූරිය රජු සිංහාසනාරූඪ වීමට පෙර කුමාර අවධියේදී හේවාහැට ප්‍රදේශයේ දිවිගෙවූ සිංහල කුමාරිකාවක් සමඟද පෙම් සබඳතාවක් පවත්වා ඇති අතර ඇයටද රජුගෙන් පුත් රුවනක් ලැබුණි.එම පුත් කුමාරයා පට්ටිය බණ්ඩාර නම් විය.පට්ටිය බණ්ඩාර කුණ්ඩසාලේ කුමාරයාට වඩා වයසින් මුහුකුරා ගිය ජ්‍යේෂ්ඨ කුමරෙක් වූවත් සියලු උඩරට රදළයන් කුණ්ඩසාලේ කුමාරයා රජකමට පත්කිරීමට සහය පළකර ඇත.

                     රජකම අහිමි   වූ පට්ටිය බණ්ඩාර දැඩි කෝපයකින් කැළෑ වැද සේනාව සංවිධානය කිරීම ආරම්භ කළේය. සිංහල කොලු ගැටවු විශාල ප්‍රමාණයක් පට්ටිය බණ්ඩාර සමඟ එක්වූ අතර නරේන්ද්‍රසිංහ නමින් උඩරට රජ පදවියට පත්වූ කුණ්ඩසාලේ කුමරුගේ රාජ සභාවේ දෙවෙනි අධිකාරම් තුමාද පට්ටිය බණ්ඩාර හට රහසේ සහය දුනි.‍රාජ සභාවේ සාමාජිකයන්ද කැරැල්ලට සහය වූ නිසා නරේන්ද්‍රසිංහ රජු යන එන තැන් පිළිබඳව කැරළි කරුවන්ට හොඳ අවබෝධයක් ලැබී තිබුණි.හඟුරන්කෙතදී රජුව ඝාතනය කිරීමේ කැරැල්ල ක්‍රියාත්මක වුණු අතර දස්කොන් නැමැති ප්‍රංශ අසරුවා සහ ලෙව්කේ දිසාව යන ප්‍රභූවරුන්ගේ තියුණු බුද්ධිය හේතුවෙන් පට්ටිය බණ්ඩාරව පහසුවෙන් සිරභාරයට ගැනීමට හැකිවිය.මෙයින් පසු දස්කොන් නැමැති ප්‍රංශ ජාතිකයාට නරේන්ද්‍රසිංහ රජු විසින්  දෙවෙනි අධිකාරම් ධූරය පිරිනමා ඇත.

         නරේන්ද්‍රසිංහ රජු අවසන් සිංහල රජු ලෙස හැඳින්වූවද  ඔහුගේ මව වඩුග නොහොත් නායක්කාර් වාංශික වන නිසා රජු තනි සිංහල ජාතිකයෙකු ලෙස හැඳින්වීමට නොහැක.තවද නරේන්ද්‍රසිංහ රජුගේ පියා වන දෙවෙනි විමලධර්මසූරිය රජුද, දෙවෙනි රාජසිංහ රජුට දාව ද්‍රවිඩ කුමාරිකාවක් බිහිකළ කුමාරයෙකි.එම කුමාරවරුන්  හට සිංහල සම්භවයක්  තිබුණ නිසා ඔවුන් සිංහල කුමාරවරු ලෙස හඳුන්වා ඇත.දෙවෙනි රාජසිංහ රජු ආරම්භ කළ දකුණු ඉන්දියානු කුමාරිකාවන් අග බිසව ලෙස තබා ගැනීමේ සිරිත ඉන්පසුව රජකමට පත්වූ සියලු සිංහල සම්භවයක්  සහිත කුමාරවරු අනුගමනය කළහ.

         ශ්‍රී වීර පරාක්‍රම නරේන්ද්‍රසිංහ රජු හට පුත් කුමාරවරු නොසිටි නිසා ඔහුගෙන් පසුව නායක්කාර් වාංශික රජෙකු පත්වූ බව ඔබ සිතන්නට ඇති. නමුත් එය නිවැරැදි නොවේ.නරේන්ද්‍රසිංහ රජු හට බාල අවධියේ සිටම පෙම් සබඳතාවක් තිබී ඇත. ඒ මොණරවිල පුංචි කුමාරිහාමි සමඟය. නරේන්ද්‍රසිංහ රජු රජකමට පත්වූ පසු තමාව අගබිසව ලෙස නම්කරතැයි සිතා සිටි මොණරවිල පුංචි කුමාරිහාමි   හට අවසානයේදී  සිදුවූයේ රජුගේ යකඩ දෝළිය නොහොත් උප බිසව බවට පත්වීමටය.එකළ සිංහල  රාජ සම්මතයන්ට අනුව රජුට බිසෝවරු දෙදෙනෙක් සිටියද වාසළේ එක් බිසවක් පමණක් තබා ගැනීමට අවසර හිමිවිය.එබැවින් මොණරවිල පුංචි කුමාරිහාමි හට දිගටම මාතලේ සිය උපන් වලව්වේම දිවි ගෙවීමට

 සිදුවිය.කුමාර අවධියේදී  රජු සමඟ පැවැත්වූ පෙම් සබඳතාවේ ප්‍රතිඵලයක් ලෙස  මොණරවිල කුමාරිහාමි කුමාරයෙකු බිහි කළාය.ඒ කුමාරයා "උනම්බුවේ කුමාරයා" නම් විය . අවසන් සිංහල රජුට ලැබුණු අවසන් සිංහල කුමරාගේ ඉරණම වූයේ කුමක්ද.....

               නරේන්ද්‍රසිංහ රජුගේ නෑදෑ හිතවතුන් රජු හට දකුණු ඉන්දියාවෙන් සූර්ය වාංශික කුමාරිකාවක් ගෙන්වීමට රාජ නියෝජිතයන්  පිරිසක් දකුණු ඉන්දියාවට පිටත් කර හැරීය. ඒ වන විටත් දරු ගැබක් එල්ලාගෙන මාතලේ වලව්වේ තනිවී සිටි මොණරවිල පුංචි කුමාරිහාමි ගැන සිතමින්  ශෝකයෙන් කාලය ගතකළ නරේන්ද්‍රසිංහ රජු හට රාජ සම්මතයන්ට පිටින් යාමට නොහැකි විය.

               නරේන්ද්‍රසිංහ රජු හට සූර්ය වාංශික කුමාරිකාවක් ගෙන්වා ගැනීමට මදුරාවට ගිය සිංහල ප්‍රභූන් හට අකරතැබ්බයකට මුහුණ දීමට සිදුවිය. මදුරාපුර නායක්කර් වාංශික රජු වූ විජය චොක්කනාථ සිංහල ප්‍රභූන් හට අපහාස කොට කුලහීනයන් හට දීමට සූර්ය වාංශික කුමාරිකාවන් තමා ළඟ නොමැති බවත් මින් පෙර කිසිදු විවාහ සබඳතාවක්  සිංහලේ රජු අතර  ඔහුට තිබී නැති බවත් සඳහන් කර සිංහල ප්‍රභූවරුන් ව එළවා දමා ඇති බව එරට වාර්තාවල දැක්වේ.කිසිදු කුමාරිකාවක් නොදී ඔවුන්ව පළවා හරින ලෙස නියෝග කිරීමට තරම් විජය චොක්කනාථ රජු දරුණු විය.මින් පෙර කිසිදු විවාහ සබඳතාවක්  උඩරට රජු අතර තිබී නැති බව සඳහන් කිරීමෙන් දෙවෙනි රාජසිංහ සහ දෙවෙනි විමලධර්මසූරිය යන රජවරුන් බිසෝවරු ගෙන්වූයේ මොන දේසයෙන්ද යන්න ඉතිහාසය ප්‍රශ්නාර්ථයක් මතුකර ඇත.

             සිංහල ප්‍රභූවරු කුමාරිකාවක් නොමැතිව උඩරට රජුට මුහුණ දීමට  නොහැකිව ලන්දේසි නැවේ නැවතත් ලංකාව බලා පිටත් වන බව මදුරාපුර සිටි වෙළෙන්දෙක් හට ආරංචි වී ඇත.ඔහු නමින් පිට්ටිනායක්කර් වන අතර කලකට ඉහතදී ඔහු ධන කුවේරයෙක් වූවත් පසුකාලීනව ඉතා දිළිඳු භාවයට පත්වූ අයෙකි. ඔහු සිය දියණිය නරේන්ද්‍රසිංහ රජු හට දීමට එකඟ විය.පිට්ටිනායක්කර් ගේ නාමය වංශවත් නායක්කර් වරුන්ගේ නාමයන් දැක්වෙන් එරට ලිපියක සඳහන් වී නොමැති බැවින් පිට්ටිනායක්කර්  සූර්ය වාංශිකයෙක් නොවන බව පැහැදිලිය.මෙය උඩරට රාජ්‍යට අපහාස කිරීමට ගෙතූ කතා බව පිරිසක් පෙන්වා දුන්නද පිට්ටිනායක්කර් සිය පවුල සමඟ ලංකාව බලා පැමිණි ලන්දේසි නැවේ නාවික වාර්තා අධ්‍යයනය කරන විට එය සත්‍යයක් බව වැටහේ.

         ලංකාවට පැමිණි පසු උඩරට රාජ්‍යට දෝලාවලින් ඇතුළු වූ පිට්ටිනායක්කර් පවුල ඉන් පිටතට ගත් උඩරට රන්මොලක අධිකාරම් තුමා එම අඩවියේ දෝලාවලින් ගමන් කළ හැක්කේ රජුට සහ මහනිළමේ වරුන් හට පමණක් බව දන්වා ඇත. නරේන්ද්‍රසිංහ රජු  හා පිට්ටිනායක්කර් ගේ දියණිය අතර විවාහ මංගල්‍යයද සිදුවූ අතර පිට්ටිනායක්කර් හට රජු විසින් රාජ සභාවේ මොහොට්ටි තනතුරක් ද ලබා දීමට කටයුතු කර ඇත.පසුකාලීනව ඔහු "පිට්ටි මොහොට්ටි" නමින් හඳුන්වා දී ඇත.

පිට්ටිනායක්කර් ගේ භාර්යාව වන අභිරාම් දේවිය උඩරට දී නැවතත් ගැබ් ගත්තාය.දරු ප්‍රසූතිය දිනයේ අලුත උපන් පුත්‍රයාගේ කේන්දරය රාජමාළිගාවේ   රාජකීය නැකැත්කරුවා හට දී බලවාගත් පිට්ටිනායක්කර් පුදුම වූයේ එහි සඳහන් වූ කාරණාවකටය. එය නම් පිට්ටිනායක්කර් ගේ අලුත උපන් පුත්‍රයාට රාජයෝගයක් තිබීමය. එය  නැකැත්කරුවා සමඟ රහසක් ලෙස තබා ගත් පිට්ටිනායක්කර් ඔහුගේ පුත්‍රයාට රාජ අනුග්‍රහයෙන් සියලු ශිල්ප ශාස්ත්‍ර ලබා දුන්නේය.

         පිට්ටිනායක්කර් සිය පුත්‍රයාව වැලිවිට සරණංකර හිමි වෙත යොමු කළේ සියලු ශාස්ත්‍රයන් නිසි පරිදි ලබා දීමටය.එහිදී පිට්ටිනායක්කර් ගේ පුත්‍රයාට නරේන්ද්‍රසිංහ රජුගේ සිංහල පුත්‍රයා වූ උනම්බුවේ කුමාරයා වද ඇඳින ගැනීමට ලැබුණි. පිට්ටිනායක්කර් ගේ පුත්‍රයා අකුරු ඉගෙනීමේදී පෙන්වූ දක්ෂතා සියල්ලන්ම මවිත කළ අතර ඔහු උනම්බුවේ කුමරුව සියළු අංශ වලින් දෙවෙනියා බවට පත් කළේ " නායක්කර් හාමුදුරුවෝ " යන නාමයද ලබා ගනිමිනි . පිට්ටිනායක්කර් ගේ පළමු කාර්යය ඉන් අවසන් වූයේ සිය පුත්‍රයා මහා පඬියෙකු බවට පත්කරමිනි.

          දෙවනුව පිට්ටිනායක්කර් සිය පුත්‍රයාව නරේන්ද්‍රසිංහ රජු හට සමීප කළේය.දස්කොන් අධිකාරම  සහ නරේන්ද්‍රසිංහ රජුගේ බිසව  අතර අනියම් සබඳතාවක් ඇති බව දැනගත් රජු ඒ පිළිබඳ ව නිසි පරිදි  සොයා නොබලා දස්කොන් ව මරා දමන්නේ හදිසි රාජ කෝපය නිසාවෙනි.පසුව සිය හොඳම මිත්‍රයා වන දස්කොන් නැති ශෝකයෙන්  සිටි නරේන්ද්‍රසිංහ රජු හට සමීප වුණු පිට්ටිනායක්කර් ගේ පුත්‍රයා රජු ගේ හොඳ මිත්‍රයෙක් බවට පත්විය.

              රජු 1739 දී  මියයන විට රජුට දාව ප්‍රධාන බිසවට කුමාරයෙකු නොවීය. උනම්බුවේ කුමාරයා සූර්ය වාංශික නොවන බව පවසා සිංහල ප්‍රභූවරුන් ම උනම්බුවේ කුමාරයව වාසළෙන් පළවා හැරියෝය. 

                නව රජු පත්කිරීමේදී  ප්‍රභූවරුන් පිළ් දෙකකට බෙදුණි.ලෙව්කේ දිසාව උනම්බුවේ කුමාරයා පත්කිරීමට වෙහෙස වූවද  එවකට අධිකාරම් ධූරය දැරූ නිළමේවරයා සහ සරණංකර හිමි ප්‍රමුඛ සංඝරත්නය ඉල්ලා සිටියේ පිට්ටිනායක්කර් ගේ පුත්‍රයා හට කිරුළ ලබා දෙන ලෙසය.

           එය එලෙසම සිදු වූ අතර උඩරට රාජ්‍යයට නව නීතියක් හඳුන්වා දෙමින් එතැන් සිට ප්‍රධාන  බිසවගේ නොහොත් රන්දෝලියගේ සහෝදරයා හට රජකම ලැබුණි. එය නායක්කර් මරුමක්කත්ථායම් නීතිය ලෙස හැඳින්වූවද එවැනි නීතියක් නායක්කර්වරු පාලනය කළ මදුරාවේ පවා තිබී නැති බව පසුව අනාවරණය විය. මෙරටට පැමිණි නායක්කර් වරු කිරුළ අයත් කර ගැනීමට යෙදූ උපක්‍රමයට සිංහලයා හසුවී ඇති බව ඉන් සනාථ වේ.

          1739  දී පිට්ටිනායක්කර් ගේ පුත්‍රයා " ශ්‍රී විජය රාජසිංහ " නමින් රජකමට පත්වූයේ සිංහල රාජාවලියේ අවසානය සහ නායක්කර් වාංශික රජවරුන්ගේ ආරම්භය සනිටුහන් කරමිනි.

       නායක්කර් වාංශික ශ්‍රී විජය රාජසිංහ රජු බුද්ධ ශාසනයට විශාල සේවයක් කළ බව සඳහන් වේ...

         හුදී ජන පහන් සංවේගය පිණිසය ....

            - ජෙහාන් ගෝමස් -