පහුගිය දිනවල හා හූවක් නැගුනා කිසියම් රියලිටි වැඩසටහනක තරංග කළ දුවෙක් ගැන. වෙලාවක් නැතත් මම එක මොහොතකට ඒ කියන සින්දුව බැලුවා. මාව රසයෙන් පිනා ගියා. ඒ දරුවා හරිම දක්ෂයි. එතනින් එහාට කියන්න දෙයක් නැහැ. කමන්ට් ටිකක් බැලුවා මොකද මේ මිනිස්සු මේ ළමයට බනින්නේ කියල....
හැමෝම මේ කටේ කිරි සුවඳ නොගිය දරුවෙක්ට බනින්නේ අර අකුරු දෙකේ වචනය කියල. ඒ දරුවට එහෙම බනින්න හේතුව මොකක් වෙන්න ඇතිද මම අධ්‍යනය කළා. ඔය විදිහටම හිංසාවට ලක් වුන තරඟ කරුවෙක් තමා ශියාන් මිහිරංග. ඒකට හේතුව ලංකාවේ මිනිස්සුන්ගේ බොක්ක උණු වෙන්නේ මිනිස්සු කානුවක වැටිලා අඩු තක්සේරුවෙන් ඉන්නවා නම් විතරයි. අපි රටක් විදිහට හරිම හීන මානෙන් පෙලෙන ඉරිසියාකාර මිනිස්සු. රියලිටි ෂෝ හරියට හිඟා කෑමේ තරග වගේ. ඔවුන් ඇවිත් මාකට් කරන්නේ තමන්ගේ හැකියාවක් නෙවෙයි දුප්පත්කම. අසරණකම.
මොකද තියනවා, දන්නවා , පුළුවන් කියන පෞර්ශමත් ආකල්පයෙන් හිටියොත් අපේ මිනිස්සුන්ට පුදුම ඉරිසියාවක් දැනෙනවා. තමන්ට ඇති හීන මානය නිසා ඔවුන් පෞර්ශමත් මිනිස්සු දැක්කොත් කොහොම හරි වට්ටවන්න බලනවා. ඒ නිසා ලංකාවේ ශිෂ්‍යයෙක් වුනත් තමන්ගේ හැකියා අභිමානයෙන් හෙළි කරන්නේ නැහැ. දක්ෂ ළමයෙක් දැක්කොත් පණ්ඩිතයා කියල සවුත්තුව දාන ගුරුවරු මම දැකල තියනවා. යාළුවො බුලි කරනවා. එහෙම කරලා බැරිම වුනොත් නෝට් බුක් එක හොරකම් කරලා විසික් කරනවා පාඩම් කරන්න බැරි වෙන්න. ඒ වගේ ජරා මිනිස්සු ඒ රටේ බහුලයි.
මනුස්සයෙක් ගමක ඉපදෙනවා, නගරෙක ඉපදෙනවා කියන්නේ මහා අමුතු දේවල් නෙවෙයි. ගමක ඉපදුනා කියල කවුරුත් ලජ්ජා වෙන්න දෙයක් නැහැ වගේමයි නගරෙක ඉපදුනා කියල කවුරුත් කාටවත් වෛර කරන්න දේකුත් නැහැ. මනුස්සයෙක්ගේ දක්ෂතා හැකියා කියන්නේ ඒ මනුස්සයට වෛර කරන්න කොහෙත්ම හේතුවක් නෙවේ. මේ සයිබර් ප්‍රහාරය නිසා අනාගතේ දියණි වරු කී දෙනෙක් තමන්ගේ හැකියා ප්‍රදර්ශනය නොකරන්න බය වෙයිද?
අපි හැම වෙලේම අනික් මනුස්සයාගේ හැකියාව දැකල සතුටු වෙන්න මනසක් හදාගන්න ඕනේ. ඔයාට තව කෙනෙක්ගේ හැකියාව දකිද්දී , පෞර්ෂය දකිද්දී ඉරිසියා හිතෙනවා නම් ඒක මානසිකව නිරෝගී ;ලක්ෂනයක් නෙවෙයි. එහෙම හිතෙනවා නම් ඒ හිතුවිලි වෙනස් කරගෙන සතුටු වෙන්න. එතකොට ඒ දේවල් ඔයාගේ ජීවිතේටත් එකතු වෙනවා.
ඒ වීඩියෝ එකේ කමෙන්ට් දැකල මට ලොකු බයක් ආවා. මේ වගේ හීනමානයෙන් ඔද්දල් වුන මානසිකව නිරෝගී නැති මිනිස්සු බහුල රටක දරුවෝ හදන එක ලොකු අනතුරක්. හැකියාවක් දැක්කොත් මරාගෙන කන මිනිස්සු ඉන්න රටක දුප්පත්තු, හිඟන්නෝ, සමුර්ධියෙන් කන මිනිස්සු මිස ව්‍යවසායකයෝ, Entertainers ලා , ලෝකෙට යන විදිහේ මිනිස්සු හැදෙන්නේ නැති වීම පුදුමයක් නෙවෙයි.
No comments:
Post a Comment