මම පහුගිය වතාවෙ ලන්කාවට ගිහාම කුඩා පිරිමි දරැවන්ගෙ නිවාසයකට ගියා එයාලට අවශ්‍ය දේවල් අරගෙන. එතන ඇති වූ කතා බහේදී ඒ ළමයි කියපු එක දෙයක් තමා එයාල ලොකු වෙලා හොඳ තැනකට ගිහින් කවදහරි ගන්න වාහන මොනවද කියන එක. එතන හිටපු හැම දරැවෙක්ටම ඕනෑ උනේ විසාල අධි සුඛෝපභෝගී වාහන, සමහර ඒව මම දන්නෙත් එදා. ඒ ළමයි අතර කිසි කෙනෙක් අවශ්‍යතාවයට ගැළපෙන, ඉන්ධන පිරිිමහන, පරිසරයට හිතකාමී සාමාන්‍ය මට්ටමේ වාහනයක් පිළිබඳ සිහින දැක්කෙ නෑ.
එක්තරා ටියුෂන් ගුරැවරයෙක්ගේ වීඩියෝවක ඔහු අවධාරණය කරනවා ළමයින්ට ලොකු හීන දකින්න කියල, උදාහරණයකට, උසස්පෙළ බයෝ ළමයෙක්ට දොස්තර කෙනෙක් වෙලා ගමේ ඩිස්පෙන්සරියක් දා ගැනීම වගේ පොඩි හීනයකට වඩා තමන්ගෙ ක්ශේත්‍රයේ විශේෂඥයෙක් වෙලා ලෝකයේ කරක් ගහල අත්දැකීම් සහ මුදල් යහමින් හම්බ කිරීම වගේ. මේ වීඩියෝ එකට යටින් එක උසස්පෙළ ළමයෙක් කොමෙන්ටුවක් දාල තිබ්බ මෙහෙම. සර් කියන ජීවිතය විඳීම සාපේක්‍ෂ දෙයක්. මට නම් ජීවිතේ උපරිම විඳීම තියෙන්නෙ බස් එකේ ජනේලෙ ලඟ සීට් එකක වාඩිවෙලා නුවර ගිහින් දළදා මාළිගාව වැඳීම තුල මිසක ලෝකෙ වටේ ඇවිදින එක වත් ගොඩක් සල්ලි හොයන එකවත් නෙමේ කියල.
මේ සිද්දි දෙකම මතක් උනේ සමාජ මාධ්‍යයේ දැකපු පෝස්ටුවක් නිසා. පෝස්ටුවේ මුල් අයිතිකරැගේ නම හොයා ගන්න නොහැකි උනා. ඉහත සඳහන් කරපු සිද්දි දෙකේම පොදු සාධකය තමයි තමන් කවදාවත් විඳපු නැති "සුවයක්" පිළිබඳ හදාගත්ත ෆැන්ටසියක් තිබීම. වෙනස්කම තමයි නිවාසයේ ළමයි තමන්ගේ වර්තමාන ජීවන තත්වයට වඩා ෆැන්ටසිය අගය කිරීම සහ උසස්පෙළ සිසුවා ෆැන්ටසියට වඩා වර්තමාන ජීවන තත්වය අගය කිරීම. නමුත් මෙතන ලොකුම ගැටළුව වන්නේ තමන් කවදාවත් නොලබපු අත්දැකීමක් ගැන දැනටම දැඩි පූර්ව විනිශ් යයක හිඳීමයි. මැස්ලෝගේ අවශ්‍යතා ධුරාවලිය මෙතැනදී මතක් වෙනවා.
තට්ටු ගානක ලොකු ගෙයක් දැක්කම අනේ මටත් ඒ වගේ ගෙයක් තිබුන නම් කියනවට වඩා අපෝ ඕව නඩත්තු කරන්න ගියාම පට්ට මහන්සියි, කොච්චර ලොකු වුනත් අපි පාවිච්චි කරන්නෙ බොහොම පොඩි කොටසයි. අවශ්‍යම පහසුකම් එක්ක පොඩි කාමර දෙකක ගෙයක් තිබුනම ඇති කියල හිතෙන්න උඹට ලොකු ගෙයක අත්දැකීම තිබිල තියෙන්නම ඕන.
තඩි ජීප් එකක් පාරෙ යද්දි අනේ මටත් ඒකක් තිබුනනම් කියල කියනවට වැඩිය. ඕවගෙ තෙල් බොනවා, ටයර් පට්ට ගනන්, මේන්ටෙනන්ස් වලට වියදම් වැඩියි කියල කියන්න නම් උඹත් ලොකු වාහනයක අයිතිකාරයෙක් වෙලා තියෙන්නම ඕන.
ලස්සන කෙල්ලෙක් දකිනකොට අනේ මටත් මේ වගේ කෙල්ලෙක් හිටිය නම් කියනවට වැඩියි කොච්චර ලස්සන වුනත් ඕව පට්ට වාත, නඩත්තුව අමාරුයි, සම්භන්ධතා ඇතුලෙ තියන කටුක බව අවබෝධ කරගන්න නම් උඹටත් ඒ වගේ ලස්සන කෙල්ලෙක් ඉඳල තියෙන්නම ඕන.
පීස හට්, මැක්ඩොනල්ඩ්, KFC දකිද්දි මටත් මේවගෙන් කන්න තිබුන නම් කියල හිතනවට වඩා ඔය තැන් වල කරන්නෙ බොරු නමක් මාකට් කරල අපෙන් සල්ලි හූරං කන එක, ඔයිට වැඩිය රසට ඔයිට වැඩිය අඩුවට කන්න පුලුවන් තැන් ඕන තරම් තියනව කියල කියන්න නම් උඹත් ඒ තැන් වලින් කාල තියෙන්නම ඕන.
තමුන්ගෙ තරමට ආදායමට නොගැලපෙන බොරු පොශ් සීන් වලට ගිහින් වෙන්නෙ නිකං අතේ තියන කීයට හරි කෙලව ගන්න එක සහ තමුන් කවද හරි ආර්ථික අර්බුදයකට වැටෙනව කියල අවබෝධ වෙන්න නම් උඹ ඒ පොශ් තැන් වලට ගිහින් ඔය කියන පොශ් ලයිෆ් එක ගතකරල තියෙන්නම ඕන. එතකොට තේරෙයි ඕව ඇතුලෙ අපි මොක මොකාගෙ හරි මාකටින් කැම්පේන් වල ඉත්තො වෙලා ඉඳල තියෙන්නෙ කියල.
ඔය සමහරු කිසිම අවබෝධයක් නැතුව නැති කමට සියලු දේ අත්හරින්න කිව්වට හැමදේම කරල අවබෝධ කරගෙන අත්හැරීම තමයි හරිම අත්හැරීම. ඒ අත්හැරීම සදාකාලිකයි. ලයිෆ් එකේ ඇරියස් තියාගෙන අත්හැරීම පුරුදු කරන්න එන එවුන් තමයි පස්සෙ කාලෙක ආපහු ඕව කරන්න ගිහින් නෝන්ඩි වෙන්නෙ. 😂. ඒ හින්ද අවබෝධයෙන් අත්හරින්න.
