පාසල් ගෝත්‍රිකත්වය - Nalaka Swarnathilake

තම පාසල පිළිබඳව පමණට වඩා හුවා දක්වමින් අන් පාසල් හෙළා දකින්නෝ ඔබටත් හමු  වී ඇති. පාසල් පම්පෝරිය මේ රටේ තියෙන තවත් මිත්‍යාවක්. තම තමන්ගේ පාසල් ගැන ‍යමෙකුට අභිමානයක් තිබිය හැකියි. එහෙත් එය අනෙක් පාසලකට වඩා තම පාසල උසස් හෝ මාරයි කීමට භාවිත කිරීම හීනමානයක්. මොකද එහෙම පාසලක් ලෙස ගත්තහම ඒ පාසලේ සියල්ලෝම මාර චරිත වූ පාසලක් මිහි පිට කොහේවත් නොමැති නිසයි. අතීතයේ තිබුනෙත් නැහැ. දැනුත් නැහැ.
අපේ රටේ පහසුකම් මත නම් පාසල් වර්ග කළ හැකියි. එහෙත් ගුණාත්මකව, හැදියාව මත, දක්ෂතා මත, සුපිරිම චරිත මත අසවල් පාසල තමයි පාසල කියා නම් කළ හැකි ජගතෙකු වේ නම් හමුවනු රිසියෙමි. සෑම පාසලකම සකල විධ (හොඳ /නරක/කපටි/තක්කඩි/හොර/බොරු/වංචා/වාචාල/විනය ගරුක/ අවිනීත සහ මෙකී නොකී) චරිත ඉතා පහසුවෙන් සොයා ගත හැකියි. ඒ නිසා පාසල් මත පොදු ප්‍රකාශන හෝ පොදු කුලක සදා ප්‍රකාශ කිරීම ඉතා ගෝත්‍රික බව මගේ අදහසයි. එක් දරුවෙකුගේ හෝ ආදි සිසුවෙකුගේ විශිෂ්ටත්වයක් හෝ අවැඩක් එම පාසලේ සමස්තය මත ආරෝපණය කිරීම හෝ එය මුලුමනින්ම අදාල පාසලේ   ප්‍රතිඑලයක් ලෙස ගැනීම කිසිසේත්ම තාර්කික නොවේ. එය බොහෝ සාධකවල එකතුවකි.
නමුත් යම් පාසලකට අනන්‍ය උසස් ලක්ෂණ තිබිය හැක. එහෙත් එම උසස් බව සෑම සිසුවෙකු මත ආරෝපණය නොවේ. එසේ වන්නේ නම් ඉතා හොඳ ය. මේ නිසා කුඩා කල සිටම දරුවන්ගෙන් ඔය පාසල් ගොත්‍රිකත්වය ඉවත් කළ යුතුයි. කළ යුතු වන්නේ පාසල්වල නම් නිසා බැබලෙන දරුවන් සැදීම නොව, පාසලේ නම බබලවන ගුණාත්මක දරුවෙකු සැදීමයි.
(මේ සටහනට හේතු එමටයි. ආසන්නතම නිමිත්ත එක්තරා නෝනා කෙනෙකුගේ පාසල් ගෝත්‍රිකත්වය හා සබැඳි කතාවක්)

Nalaka Swarnathilake

මේ කතාවට සම්පූර්ණයෙන්ම එකඟයි. පහ වසරට යනකම් මම ගියේ ගමේ පාසලට, එතනින් ශිෂ්‍යත්වය සමත්වී සුපිරි කාන්තා විදුහලට. මම අද හරියට දුක් වෙනව ගමේ පාසලෙන් අස් වීම ගැන. විශාල වත්තක කඳු බෑවුම් පල්ලම් කැළෑරොද සහිත ගමේ පාසලේ නිස්කලoක නිදහස් පරිසරයත් ගමනාගමන පහසුවත් ළමයින්ගෙ ගැමි කමත් හරිම සුන්දරයි. සුපිරි පාසලේ බොරැ ආටෝපයත් මඟටම දිය වන ජීවිතයත් අනවශ්‍ය තරඟයත් මාව වෙහෙසට පත් කලා. සුපිරි පාසලේ හිටියත් නැතත් මම මගේ ගමන යන බව මම දන්නවා. මගේ ඉගනීමට සුපිරි පාසලෙන් ලැබුන එකම දායකත්වය සුපිරි දක්ශයන්ව දැක හඳුනා ගැනීමයි.

ප. ලි. මේ කතාවට අදාල පාසලට ගිය කෙනෙක් නොවෙමි. ඇත්තටම මම බොහෝ කාලයකට පෙර සිටම ප්‍රතිපත්තියක් වශයෙන් මගේ පාසලේ ලොකුකම කියන පෝස්ටු like/share කිරීම/ අනිත් පාසල් වල වැරදි කියන පෝස්ටු like/share කිරීම කරන්නේ නැහැ. උඩපැන පැන ඔය දෙකම කරන මගේ පාසලේ ආදි ශිෂ්‍යාවො බහුතරය විශ්ව විද්‍යාලයකට නොගිය පාසල හැර වෙනත් educational achievements ජීවිතයේ නොලබපු ගෑනු එහෙම නැත්නම් ඉස්කෝලෙදි එක්කො අම්ම ඉස්කෝලෙ උගන්නන නිසා වගේ අයථා ක්‍රමයකින් බලපුලුවන්කාරකම පෙන්න පෙන්න ඉඳල එළියට ගියාම එසේ කරගන්නට බැරි වෙච්ච නිසා නැවත තමන් රජකරගෙන හිටපු ඉස්කෝලෙට රිoගන්න දතකන ගෑනු එහෙමත් නැත්නම් අන්ත දුප්පත් පවුලකින් ආව හෝ ඊට සමාන හේතු නිසා ඉස්කෝලෙදි මුළු ගැන්වී පසුව දොස්තරකෙනෙක් වැනි ඉහළ සමාජ තලයට රිoගපු තමන්ට ඉස්කෝලෙ යන කාලෙ නොතිබුනු තත්වය දැන් හරි ඉස්කෝලෙන් ලබා ගන්න දතකන ගෑනු .